Мұқановтың есімі облыс жылнамасында
Академик-жазушы Сәбит Мұқановтың жақындап келе жатқан 100 жылдық мерейтойы біздер үшін, яғни жазушының атындағы кітапхана қызметкерлері мен оқырмандарына да ерекше маңызды оқиға. Соған орай кітапхана Мұқанов жылына арналған кештер, кездесулер мен экскурсиялар сияқты мерейтой циклын бастап, жүзеге асыруда. 27 жылдан бері кітапхана оның есімімен аталып келеді: Оның себебі – кітапханаға жиі мейман болып келіп жүрген КСРО Жоғарғы Кеңесінің депутаты Сәбит Мұқановтың тікелей араласып, КСРО Жоғарғы Кеңесінде үзбей мәселе көтеріп, сұрауының нәтижесінде 1972 жылы 500 мың том кітапқа арналған жаңа үлгідегі ғимаратқа ис болып едік. 1973 жылы мамыр айында кітапханаға есімі берілді.
Сол жылдан бері біз жазушының өмірі мен шығармашылығы туралы материалдар жинап келеміз. Соның нәтижесінде жазушының 80 жылдығына кітапханада республика бойынша тұңғыш және ең таңдаулы әдеби-мемориалдық бөлме-мұражай ашылды. Мұражай бөлмесіндегі экспонаттар, оның шығармалары, фотосуреттері мен хаттары және басқаларымен қатар Алматыдағы әдеби-мемориалдық мұражай берген жазушының жеке заттарымен толықтырыла түсті. Мұражай қорын толықтыратын экспозиция жасауға қаланың шығармашылық интеллигенциясы, өнер және қоғам қайраткерлері атсалысты.
Мұражай бөлмесі қазір әдеби кездесулер орнына айналып, онда Мұқанов оқулары өткізілуде. Ондағы тілектер кітабында F. Мүсірепов, Б. Төлегенова, С. Шаймерденов, И. Шухов, Л. Ошанин, Е. Евтушенко және басқа да елге әйгілі тұлғалардың қолтаңбалары бар. Жазушының зайыбы Мәриям апай мен ұлы Марат Мұқанов және басқа да туыстары кітапхана мен аталмыш мұражайда жиі қонақ болған адамдар.
Мұражай экспозициясы ұдайы толықтырылуда. Жазушының 100 жылдық мерейтойы қарсанында С. Мұқанов атындағы кітапхана жазушының жерлестері мен онымен жүздескен, адамдарға, басқа да зиялы қауым өкілдерін «Мұқановтың есімі облыс жылнамасында» атты қайырымдылық акциясына белсене қатысып, оның адеби-мемориалдық мұражайын толықтыруға атсалысуға шақырады. Жазушының өмірі мен шығармашылығына қатысты фотосуреттер, құжаттар, қолжазбалары мен кітаптары және басқа да заттардын қайсысы болмасын мұражай игілігіне айналып, төрден орын алатын болады.
Мұқановтың есімі облыс жылнамасында // Солтүстік Қазақстан.-2000.-19 қаңтар.